Ish-ministri i Jashtëm, Ditmir Bushati, ka reaguar në lidhje me debatin e krijuar pas koncertit që mbajti reperi amerikan Kanye West në Tiranë, ku nuk i ka kursyer kritikat për qeverinë.
Në nëj postim në Facebook, Bushati shkruan se Shqipëria ka nevojë si për protesta, ashtu edhe për koncerte dhe se debati i ngritur mes tyre, është përçarës dhe nuk i shërben interesit publik.
Ish-ministri shkruan se koncertet janë të rëndësishme, por nuk mund të zëvendësojnë mesazhin që japin protestat qytetare.
Ndërsa më tej, ish-ministri nuk ka lëbë pa kritikuar qeverinë, për të cilën thekson në postimin e tij se paratë duhet shpenzuar për aegëtim, në kohën kur vendi përballet me probleme ekonomike dhe sociale.
Postimi i plotë i Bushatit:
SHQIPTARËT VENDIMMARRËS, JO SPEKTATORË
Në një shoqëri demokratike njerëzit janë të lirë të bëjnë zgjedhjen që mendojnë se është më e mira për ta. Debati i stisur mes protestës dhe koncertit është përçarës dhe joproduktiv. Shqipëria ka nevojë edhe për protesta edhe për koncerte.
Dritat dhe hareja e një koncerti zgjasin pak, krahasuar me protestat disa javore që i kanë dhënë Shqipërisë një imazh ndërkombëtar që nuk ka para e koncert që e krijon. Një imazh, që pasqyron shpirtin e gjallë të një shoqërie që ngrihet në këmbë e lufton me dinjitet për vendin e vet.
Shqetësues është fakti që politika nuk po reflekton ndaj shqetësimeve serioze që paraqet protesta, duke thelluar hendekun me popullin. Protesta që filloi si zemërim për aksesin në tokë e plazh dhe ruajtjen e trashëgimisë së përbashkët natyrore është shndërruar në një frymë më të madhe që ka të bëjë me thelbin e demokracisë. Në atë se kush e si duhet të vendoset për të ardhmen e Shqipërisë.
Pyetjet nuk duhet të shtrohen nëse je me koncertin apo me protestën, pasi janë dy anë dhe jo dy pole, siç duan t’i trajtojnë brigadat digjitale.
Pyetjet që kërkojnë përgjigje kanë lidhje me thelbin e sistemit qeverisës që duam të ndërtojmë: Pse duhen shpenzuar paratë publike për argëtim, ndërsa vendi përballet me probleme më të mprehta ekonomike e sociale? Pse shqiptarët duhet t’i japin miliona euro një kompanie private dhe një një artisti që nuk kontribuon në zhvillimin kulturor të vendit? Edhe sa kohë do ta trajtojmë kulturën si spektakël?
Në këto kushte, përvetësimi politik dhe financimi me paratë tona i koncertit merr rëndësi përtej koncertit dhe emrit të artistit. Pasi zbulon një model të vjetëruar qeverisës.
