Seanca gjyqësore ndaj Ilir Metës dhe Monika Kryemadhit u zhvillua mes tensionesh dhe përplasjesh verbale, ku nuk munguan replikat e forta mes të pandehurve, përfaqësuesve të akuzës dhe trupit gjykues.
Pasi avokatët paraqitën argumentet e mbrojtjes, Ilir Meta mori fjalën për të kundërshtuar akuzat që, sipas tij, e lidhin me ndërhyrje apo ndikime në çështje që kanë të bëjnë me Adrian Shatkun dhe emra të tjerë të përmendur nga prokuroria.
“Asnjë sms e Ilir Metës, as e Monikës, as për Shatkun, as për Pirro Xhixhon, as për dreqin. Të gjitha janë shpifje. Nuk ekziston asnjë mesazh. Kjo është histori grekësh. Shatku duhet të vinte këtu të sqaronte çdo gjë. Por është arratisur nga shqipëria. Kjo është histori e sajuar nga grekë kundër Ilir Metës. Jam rrëmbyer nga kjo histori mashtrimi”, deklaroi Meta.
Më tej, ish-presidenti mohoi çdo rol të tij në veprimet që përmenden në dosje, duke theksuar se nuk ka ushtruar ndikim as mbi veprimtarinë e Kryemadhit.
“Nuk ekziston asnjë ndërhyrje imja. As për veprimet e Monikës nuk kam ndërhyrje, i di vetë ajo veprimet e saj. Tek unë nuk figuron asgjë, nuk ekziston asgjë”, u shpreh ai.
Gjatë seancës pati ndërhyrje edhe nga Monika Kryemadhi, e cila reagoi me ironi ndaj pretendimeve të ngritura nga organi i akuzës.
“Me llafet që të sjell Altin Dumani, thashetheme flet këtu. Mos u merr me llafe grash. Akoma merresh me thashethemet e Tedi Blushit?”, tha Kryemadhi.
Komentet e saj shkaktuan reagimin e menjëhershëm të gjykatës, e cila i kërkoi të respektonte rregullin në sallë. Megjithatë, Kryemadhi vijoi me deklarata të tjera, duke theksuar se prej vitesh dëgjon të njëjtat akuza.
“Kam katër vjet që e dëgjoj. Edhe babai im të çohet nga varri nuk e duroj dot më”, tha ajo.
Pas kësaj ndërhyrjeje, gjykata paralajmëroi se çdo përsëritje e sjelljeve të tilla do të sillte largimin e saj nga seanca.
“Paralajmërojmë të pandehurën Monika Kryemadhi, nëse e përsërisni do të largoheni nga seanca”, deklaroi gjyqtari./ JOQ
