Tanimë është zyrtare, Shqipëria është në mesin e vendeve që Shtetet e Bashkuara të Amerikës kanë vendosur që t’i pezullojnë përkohësisht “vizat emigruese”.
Së fundmi ka ardhur dhe një reagim nga Ambasada e Shteteve të Bashkuara të Amerikës në Tiranë e cila ka bërë të qartë që duke filluar nga data 21 Janar Departamenti i Shtetit do të pezullojë lëshimin e të gjitha vizave emigruese për aplikantët që janë shtetas të 75 vendeve, mes tyre edhe Shqipëria.
Sa i përket atyre aplikantëve të cilëve u është caktuar data e intervistës, Ambasada sqaron se procedura do të vijojë, mirëpo viza emigruese nuk do t’iu jepet deri në një njoftim të dytë.
“Aplikantët për vizë emigruese që janë shtetas të vendeve të prekura mund të dorëzojnë aplikimet për vizë dhe të marrin pjesë në intervista, dhe Departamenti do të vazhdojë të caktojë takime për aplikantët, por asnjë vizë emigruese nuk do të lëshohet për këta shtetas gjatë kësaj periudhe pezullimi”, thuhet ndër të tjera në reagimin e Ambasadës.
Duke theksuar se nga ky vendim i orëve të fundit nuk përfshihen shtetasit të cilët dëshirojnë të vizitojnë Amerikën për turizëm apo biznesi, Ambasada thekson se Administrata Trup ka bërë të qartë se emigrantët duhet të përballojnë vetë financat dhe të mos bëhen “barrë” për shtetin amerikan.
