Rënia e EURO-s ka prekur një rekord të ri historik. Kursi i këmbimit ka hyre në momentin kur efekti sezonal veror është më i fortë se kurrë, për shkak të “pikut” të sezonit turistik.
Sipas kursit zyrtar të këmbimit të Bankës së Shqipërisë, Euro u këmbye me 101.4 lekë, duke zbritur në një minimum të ri historik. Zhvlerësimi i Euros me bazë vjetore ka arritur tashmë në 13.3%, ndërsa që nga fillimi i këtij viti kursi i këmbimit euro-lek ka rënë me 11.2%.
Rënia e lirë e Euros po ndiqet me ritme të ngjashme edhe nga valutat e tjera kryesore. Dollari tashmë duket drejt rënies poshtë kuotës së 90 lekëve, në nivelin më të ulët që prej fundit të vitit 2008. Monedha e gjelbër u këmbye sot me 90.2 lekë, në rënie me 21.8% krahasuar me një vit më parë dhe me 15.7% që nga fillimi i vitit.
