Pas më shumë se 17 vitesh pa ndërhyrje, në Kanalin e Vivarit në Butrint ka nisur procesi i dragimit, i cili në fazën e parë parashikon largimin e rreth 50 mijë m³ sedimenteve.
Ndërhyrja synon të përmirësojë shkëmbimin natyror të ujërave mes Lagunës së Butrintit dhe Detit Jon, oksigjenimin dhe nivelin e kripësisë, faktorë të rëndësishëm për ruajtjen e ekosistemit dhe kultivimin e midhjes.
Gjatë inspektimit, Ministri Salla theksoi se ndërhyrja vjen pas shumë vitesh dhe lidhet drejtpërdrejt me zhvillimin e ekonomisë së zonës dhe krijimin e kushteve për rikthimin e kuotave për kultivimin e midhjes.
“Jemi në Kanalin e Vivarit, bashkë me kryetarët e bashkive Sarandë dhe Konispol, deputetët dhe ekipin e Ministrisë së Bujqësisë, për investimin që po kryejmë për thellimin e kanalit. Për herë të parë pas shumë vitesh do të hapim edhe kuotat e midhjes, një proces shumë i rëndësishëm për ekonominë vendase, por edhe për konsumatorin shqiptar. Është një punë e përbashkët mes Ministrisë së Bujqësisë, pushtetit vendor dhe peshkatarëve të zonës. Duhet ta ruajmë të gjithë së bashku, që pas kaq vitesh të hapim më në fund kuotat për midhjen dhe t’i japim një shtysë të re ekonomisë vendase”, u shpreh Ministri Salla.
Punimet po realizohen përmes një drage të posaçme, e cila mundëson ndërhyrjen deri në thellësinë e nevojshme të kanalit dhe largimin e sedimenteve të grumbulluara ndër vite. Procesi synon të rikthejë qarkullimin natyror të ujërave dhe të krijojë kushte më të favorshme për habitatin e Lagunës së Butrintit.
Kryetari i Bashkisë Sarandë, Oltion Çaçi, vlerësoi rëndësinë e investimit për kultivuesit e midhjes dhe perspektivën e zgjerimit të tregut. Sipas tij, ndërhyrja do të krijojë kushte që prodhimi të zhvillohet me ritmet e nevojshme, duke iu përgjigjur kërkesës në rritje nga konsumatorët dhe turistët, si dhe duke krijuar perspektivë për eksport.
Ministri Salla nënvizoi se ruajtja e këtij investimi kërkon bashkëpunimin e institucioneve qendrore, pushtetit vendor dhe komunitetit të peshkatarëve e kultivuesve të zonës.
