Kryeministri Edi Rama është filmuar mëngjesin e kësaj të diele në aeroportin e Bazelit. Në pamjet e siguruara, Rama shihet duke ecur në ambientet e aeroportit, i shoqëruar nga një efektiv policie.
Prania e tij në Bazel përkon me zhvillimin e Art Basel, një nga ngjarjet më prestigjioze të artit bashkëkohor në nivel botëror, ku kreu i qeverisë shqiptare është pjesë e programit zyrtar.
Udhëtimi i Ramës zhvillohet ndërsa në Shqipëri protestat kundër qeverisë së tij kanë hyrë në javën e tretë. Mijëra qytetarë kanë dalë në rrugë në kundërshtim të projektit të investimit në Zvërnec, duke kërkuar dorëheqjen e qeverisë dhe rishikimin e vendimmarrjeve që lidhen me këtë projekt.
Sipas programit zyrtar të Art Basel, Rama është përfshirë në seksionin publik “Parcours” me veprën e tij artistike të titulluar “Societe A”. Bëhet fjalë për një skulpturë monumentale të realizuar mbi bazën e vizatimeve dhe skicave që ai ka krijuar gjatë ushtrimit të detyrës si Kryeministër, shpesh mbi dokumente zyrtare qeveritare.
Organizatorët e ekspozitës e përshkruajnë veprën si një ndërthurje mes jetës politike dhe praktikës artistike, ku vizatimet e realizuara gjatë mbledhjeve, takimeve dhe proceseve të punës shndërrohen në një objekt skulpturor me përmasa të mëdha.
Projekti artistik i Ramës bazohet në një proces që nis nga skicat e vizatuara me dorë, vijon me modelimin përmes printimit 3D dhe përfundon me derdhjen në bronz. Rezultati është një strukturë biomorfike mbi dy metra e lartë, e konceptuar si një hapësirë e hapur takimi dhe ndërveprimi publik.
