Kryeministri Edi Rama ka reaguar sërish për protestat që po zhvillohen në kryeqytet prej 102 ditësh.
Publike është bërë një video e një grupi protestuesish, të cilët kanë bllokuar një kryqëzim në Tiranë dhe nuk lejojnë automjetet të kalojnë. Jo vetëm kaq. Nga pamjet shihet sesi situata mes shoferit dhe protestuesve tensionohet dhe makina e tij goditet e rruga i bllokohet.
Kreu i qeverisë thotë se përveç dhunës së ushtruar ndaj deputetëve duke mos i lejuar as të hyjnë në Kuvend apo të dalin pa u qëlluar me vezë, ky fenomen tashmë po shihet dhe mes qytetarëve. Madje ai ironizon dhe togfjalëshin “akte të izoluara”, siç i janë referuar rastit të deputetes Iris Luarasi në disa reagime publike.
“Gjyshja ime e mrekullueshme më mësoi urtësinë e vjetër latine: errare humanum est, perseverare diabolicum. Të gabosh është njerëzore, por të këmbëngulësh në të njëjtin gabim është djallëzore. Përgjigjja juaj, më bën të pyes veten nëse pikërisht politikanë si ju kanë frymëzuar pjesën e dytë të kësaj shprehjeje. Ju e dënuat dhunën ndaj përfaqësuesve të zgjedhur vetëm pasi unë jua vura pamjet përpara syve. Dhe më pas, menjëherë, e minimizuat atë duke e quajtur “akte të izoluara”. Prej 101 ditësh, protesta është zhvilluar në bulevard pa asnjë problem sa i përket të drejtës për t’u tubuar, për të folur dhe për të kritikuar. Por të pengosh fizikisht deputetët e zgjedhur që të hyjnë në Parlament dhe të abuzosh me një deputete të respektuar, e cila thjesht po përpiqet të shkojë në vendin e saj të punës, nuk është kundërshtim. Është dhunë. Dhe e dini çfarë? Ja ku vjen tani një tjetër shembull i freskët i “akteve tuaja të izoluara”. Protestuesit bllokojnë një kryqëzim të qytetit, rrethojnë makinën e një qytetari të zakonshëm, i cili thjesht kërkon të kalojë, dhe fillojnë ta godasin atë. Për çfarë është fajtor ai, saktësisht? Sepse po përpiqet të vazhdojë rrugën e tij? A do të kishit mirësinë ta dënonit qartë edhe këtë, pa asnjë justifikim? Unë nuk po e përdor dhunën e disave për të diskredituar çdo protestues. Jeni ju që po përdorni sjelljen paqësore të shumëkujt për të minimizuar dhunën e të tjerëve. Hajde, tregohuni të guximshëm dhe thuajeni: Ky nuk është kundërshtim. Është dhunë”, shkruan Rama.
