Duhej të fliste për përgatitjet për zgjedhjet vendore të 14 majit, por pasi ka dalë nga selia rozë, ku u takua me drejtuesit politikë të qarqeve, kryeministri Edi Rama është bombarduar me pyetje nga gazetarët për arrestimin e zyrtarit të FBI-së Charles McGonigal, me të cilin kishte njohje.
Rama ka hedhur poshtë akuzat, që siç tha ai ngrihen vetëm në këtë pjesë të botës nga politika e gjyslyqeve të zhurmshme, duke thënë se hetimi i McGonigal në SHBA tregoi që nuk ka asnjë lidhje me kryeministrin shqiptar.
“Besoj që njerëzit normalisht duhet të jenë mësuar që këtu opinioni ndahet në një pjesë që beson me doemos atë që do të besojë, dhe një pjesë tjetër që dëgjon dhe reflekton mbi faktet. Kjo është një çështje e drejtuar nga drejtësia amerikane. Kështu që në rastin konkret ka zero akuzë dhe zero lidhje mes çështjes që diskutohet dhe mes meje apo Republikës së Shqipërisë. Zero. Këto janë derivate të keqleximit të këtushëm”, tha Rama.
