Kryeministri Edi Rama deklaroi se protestat kundër projektit në Zvërnec nuk lidhen me shqetësime mjedisore, por i cilësoi si pjesë të një veprimtarie që ai e përshkroi si “luftë hibride”, duke theksuar se pas tyre fshihen iraninët.
Ai foli gjatë Samitit BE-Ballkani Perëndimor në Tivat, ku gjithashtu theksoi rëndësinë e bashkëpunimit rajonal dhe përgjegjësive që secili vend duhet të mbajë.
“Ky nuk është vetëm një debat mjedisor. Është edhe çështje e një lufte hibride. Ka armiq të Shqipërisë që i njohim mirë. Regjimi iranian, i përfshirë prej kohësh në sulme kibernetike kundër vendit tonë, është pjesë e përpjekjeve për të përhapur narrativën se projekti synon sjelljen e palestinezëve nga Gaza në Shqipëri“, tha Rama.
Gjatë ditëve të fundit, janë zhvilluar pesë protesta radhazi kundër ndërtimit të kompleksit turistik në zonën e Zvërnecit, ndërsa për sot është paralajmëruar protesta e gjashtë.
Protestuesit kërkojnë anulimin e çdo nisme që sipas tyre dëmton ekosistemin e Lagunës së Nartës dhe territorin përreth, ndërsa disa prej tyre kanë artikuluar edhe kërkesa politike, përfshirë dorëheqjen e kryeministrit.
