Ambasada e Gjermanisë në Tiranë ka reaguar në rrjetet sociale lidhur me protestën e mbrëmshme të opozitës në rrugët e kryeqytetit.
Fillimisht në reagim, ambasada gjermane bie dakord me qëndrimin e Delegacionit të BE-së në Tiranë.
Më pas shton se e drejta për protestë dhe demonstrim nuk justifikon dhunën dhe se udhëheqësit politikë kanë përgjegjësi për një bashkëjetesë paqësore në demokraci.
“Ambasada Gjermane mbështet fuqimisht deklaratën e delegacionit të BE-së kundrejt dhunës së papranueshme gjatë protestave të fundit. Protesta politike dhe e drejta për të demonstruar nuk mund të justifikojnë kurrë dhunën kundër njerëzve ose pronës. Udhëheqësit politikë duhet të përmbushin përgjegjësinë e tyre për bashkëjetesë paqësore në një demokraci“, njofton Ambasada Gjermane.
