Duke nisur nga data 1 korrik, Irlanda do të marrë kryesimin e presidencës gjashtëmujore me rotacion të Këshillit të Bashkimit Evropian, një periudhë që pritet të jetë e rëndësishme për axhendën e zgjerimit të Unionit dhe për proceset integruese të vendeve kandidate.
Në këtë kuadër, ministri i Shtetit për Çështjet Evropiane dhe Mbrojtjen i Irlandës, Thomas Byrne TD, ka zhvilluar ditën e sotme një bisedë telefonike me ministren e Shtetit dhe Kryenegociatoren për pranimin e Shqipërisë në Bashkimin Evropian, Majlinda Dhuka.
Gjatë bisedës, palët diskutuan mbi ecurinë e procesit të integrimit të Shqipërisë dhe hapat që priten të ndërmerren në vijim, veçanërisht gjatë presidencës irlandeze të BE-së. Ministri Byrne theksoi rëndësinë e vazhdimit të reformave të brendshme nga Shqipëria, si një element kyç për avancimin në rrugën drejt anëtarësimit.
“Gjatë viteve të fundit, Shqipëria ka bërë përparim të jashtëzakonshëm në procesin e saj të pranimit në BE, duke hapur të gjashtë grupet negociuese brenda një viti dhe duke përmbushur standardet e përkohshme të Sundimit të Ligjit të përcaktuara për Kapitullin 23 mbi Gjyqësorin dhe të Drejtat Themelore, si dhe Kapitullin 24 mbi Drejtësinë, Lirinë dhe Sigurinë,” u shpreh Byrne, duke shtuar më tej se këto zhvillime përbëjnë momente të rëndësishme në procesin e integrimit, duke krijuar bazën për një progres të mëtejshëm gjatë periudhës së presidencës irlandeze të BE-së.
Ministri kujtoi gjithashtu angazhimet e tij të mëparshme me autoritetet shqiptare, përfshirë vizitën në Tiranë dhe takimet e zhvilluara në Dublin me përfaqësues të qeverisë shqiptare, duke vlerësuar përpjekjet e vendit për përafrimin e legjislacionit me atë të Bashkimit Evropian dhe përkushtimin ndaj vlerave të Unionit.
“Gjatë Presidencës Irlandeze të BE-së, zgjerimi do të jetë një përparësi kyçe. Ne synojmë të avancojmë të gjitha vendet kandidate, në përputhje me reformat e nevojshme. Prioritet do të kenë fushat e sundimit të ligjit, luftës kundër korrupsionit dhe reformës në drejtësi, si themele të procesit të zgjerimit,” deklaroi Byrne.
Ai u shpreh optimist se gjashtë muajt e ardhshëm do të shërbejnë si një periudhë e rëndësishme bashkëpunimi mes Irlandës dhe Shqipërisë, me synimin për të shënuar përparim konkret në procesin e anëtarësimit të vendit në Bashkimin Evropian.
