Prokuroria e Posaçme Anit-korrupsion (SPAK) ka sekuestruar pasuri të tjera në zonën e Palasës.
Detaje të reja janë bërë publike nga hetimi i SPAK ndaj ministres Belinda Balluku, ku prokuroria dyshon për një lidhje mes një tenderi publik dhe investimeve të kryera në një vilë në kompleksin “Green Coast”, në Palasë.
Prokuroria e Posaçme ka thelluar hetimet në kuadër të procedimit penal nr. 136 të vitit 2025, duke bërë të ditur se nga veprimet hetimore, metodat speciale të hetimit dhe provat dixhitale janë evidentuar fakte të reja penale në ngarkim të deputetes Belinda Balluku.
Prokuroria e Posaçme bëri të ditur sot se ka siguruar prova të reja që lidhen me tenderin për Lotin 7 të Unazës së Jashtme të Tiranës dhe një vilë në kompleksin “Green Coast” në Palasë, të cilën SPAK pretendon se është pasuri faktike e fshehur nga Belinda Balluku.
● Çfarë njofton SPAK?
“Sipas të dhënave të bëra publike nga SPAK, Arbër Abazi, pronar i kompanisë “Alko Impex General Construction”, dyshohet se ka marrë përsipër punime për përfundimin e vilës, me një vlerë të parashikuar nga rreth 288 mijë deri në 410 mijë euro.
Në të njëjtën kohë, kompania e Abazit ka qenë pjesë e bashkimit të operatorëve ekonomikë që fitoi tenderin për Lotin 7 të Unazës së Jashtme të Tiranës, me një fond limit prej rreth 2.35 miliardë lekësh pa TVSH.
SPAK dyshon se në cilësinë e Ministres së Infrastrukturës dhe Energjisë, Balluku ka ndikuar në favorizimin e kësaj kompanie gjatë procedurës së prokurimit dhe se investimet në vilë mund të kenë qenë përfitim në këmbim të këtij favorizimi”.
Ish-zëvendëskryeministrja Belinda Balluku është nën hetim për korrupsion dhe pastrim parash. SPAK ka marrë të pandehur Belinda Balluku për dyshime lidhur me procedurat e prokurimit publik. Hetimi përfshin disa tendera të zhvilluar gjatë kohës kur ajo mbante poste drejtuese./ Gazeta Shqip
