Kryebashkiaku Erion Veliaj ka reaguar pas fitores së thellë të Partisë Socialiste në zgjedhjet parlamentare.
Veliaj u shpreh se është surprizuar nga vala e jashtëzakonshme e mbështetjes që sipas tij “fshiu çdo dyshim, çdo pretendim, çdo helm e çdo baltë që iu hodh Partisë Socialiste në këto katër vite”.
Ndërsa ndodhet në paraburgimin e Durrësit, Veliaj falënderoi Tiranën dhe kolegët e tij socialistë për punën në këto zgjedhje.
“Nuk di nga t’ia nis. Jam pa fjalë, krejtësisht pa fjalë, përpara kësaj vale të jashtëzakonshme mbështetjeje që fshiu çdo dyshim, çdo pretendim, çdo helm e çdo baltë që iu hodh Partisë Socialiste në këto katër vite. 🌹 Shqiptarët folën – dhe folën fort! Folën më fuqishëm se çdo herë tjetër, që prej vitit të mbrapshtë 1997, kur i treguan vendin të njëjtit personazh grotesk që guxon të rikthehet përpara shqiptarëve, edhe sot, si të ishte një “ofertë e re”. Një gjë kam mësuar unë për shqiptarët: nuk harrojnë dhe nuk mashtrohen. Ata nuk i besojnë më Saliut & co dhe 11 maji i vuri vulën këtij diskutimi“, shkruan nder te tjera Veliaj.
