KQZ ka nisur zyrtarisht procesin e përgatitjes për zgjedhjet e 14 majit. Por pavarësisht se selia rozë ka vendosur të jetë diskrete në këtë proces, mediat kane zbuluar emrat e atyre që do të rikonfirmohen për një kandidim të dytë apo të tretë.
I padiskutueshëm është rikandidimi i Erjon Veliajt në Tiranë, po ashtu i Gledian Llajtjas në Elbasan. Pavarësisht se për Durrësin ka jo pak debate brenda PS-së së këtij qyteti, duket se kryebashkiakja aktuale do të jetë emri që do të zyrtarizohet për 14 Majin. Sipas Tv Klan, në mbledhjen e fundit të Kryesisë, Edi Rama ka deklaruar se në të 5 bashkitë ku PS fitoi në zgjedhjet e pjesshme të 6 Marsit, do rikandidohen kryetarët aktual.
Në Shkodër nuk mbahet më sekret nga socialistët se do të kandidojnë deputetin Benet Beci. Në turin që Rama zhvilloi në vjeshtë në disa bashki la të kuptohej se do të rikandidonte kryebashkiakun e Korçës, Pogradecit, Gjirokastrës, Përmetit, të Lezhës, Kamzës dhe disa bashki të tjera të vogla. Gjithashtu 3 janë emrat e socialisteve që po diskutohen aktualisht për bashkinë e Vlorës: zv.ministrja e Turizimit Vilma Bello, kreu i Urgjencës Kombëtare Skënder Brataj dhe Avokati i Shtetit Odise Moçka.
