Shqipëria është përfshirë nga një i “acar i vërtetë”. Sinoptikanët kanë dhënë sot parashikimin e motit për ditët e para të muajit shkurt që do të sjellë temperatura të ulëta, erë të ftohtë, ngrica e dëborë.
Dita e mërkurë e javës së ardhshme pritet që reshjet e dëborës të përfshijnë pjesën lindore të Tiranës, pra zonën e Dajtit, Shëngjergji dhe të gjithë rrethinat rurale, madje flokët e dëborës mund të mbërrijnë deri në Surrel. Kryeqyteti në zonën urbane ka thuajse zero mundësi që të përfshihet nga reshjet e dëborës. Ndoshta mund të vërehen flokë dëbore në orët e para të mëngjesit duke qenë se temperaturat në Tiranë janë midis 0 dhe 1 gradë. Sinoptikanët pohojnë se nuk do të ndodhë që të shijojmë dëborën me shtresa 3-4 cm brenda zonës urbane në kryeqytet.
Do kemi temperatura të ulëta ku në Bulqizë pretendohen dhe vlera -10 gradë. Ndërkohë -5, -6 gradë në zonat e Juglindjes, pritet që i gjithë territori të jetë në vlera të ulëta. Kryeqyteti mbetet 1 apo 2 gradë dhe maksimalet të jenë deri në 9 gradë.