Prokuroria e Posaçme thotë se ish-ministri Arben Ahmetaj është nën hetim, por çështja penale ndaj tij është ndarë nga procedimi për inceneratorët.
Në një reagim zyrtar, SPAK hedh poshtë pretendimet e raportuara në disa media dhe të artikuluara nga politikanë, se dy prokurorët e këtij institucioni, Ened Nakuçi dhe Klodjan Braho kanë shërbyer si mbrojtje për Ahmetajn në mënyrë që të mos hetohej. SPAK thotë se Ahmetaj është duke u hetuar nga prokurore Enkeleda Millonaj.
“Prokuroria e Posaçme kundërshton çdo tentativë për intimidim dhe sulme personale ndaj prokurorëve të posaçëm që synon t’i kufizojë ata nga kompetenca dhe përgjegjësia e tyre për të ushtruar ndjekjen penale sipas Kushtetutës dhe ligjit”, deklaron SPAK. Reagimi i SPAK vjen vetëm pak orë pasi Byroja Kombëtare e Hetimit ndërmorri kontroll në dy banesat e partneres dhe ish-bashkëshortes së Arben Ahmetajt.
