Deputeti socialist Erion Braçe ka shprehur kritika për mënyrën e funksionimit të Partisë Socialiste dhe përfshirjen e anëtarësisë në vendimmarrje.
Ai është ndalur edhe te gjendja shëndetësore e kryebashkiakut të Tiranës, Erion Veliaj: “Mendoj se Veliaj ka nevojë për shërbim akut shëndetësor dhe nuk mund t’i mohohet askujt”, deklaroi deputeti socialist.
I pyetur për debatet në Asamble dhe qëndrimet e Spiropalit, deputeti socialist theksoi se ajo ka të drejtë të shprehë mendimet e saj, ndërsa pranoi se nuk i kishte pëlqyer ajo që kishte ndodhur në mbledhje, si në pjesën me dyer të mbyllura, ashtu edhe në atë publike.
Braçe u ndal edhe te diskutimet për pasardhësin e Edi Ramës në krye të PS-së, duke deklaruar se koncepti i trashëgimtarit nuk funksionon në demokraci. Ai kujtoi vitin 2005, kur socialistët zgjodhën me votë kryetarin e tyre, ndërsa i pyetur nëse Rama është i zëvendësueshëm, u përgjigj: “Patjetër, kush nuk është i zëvendësueshëm?”












