Falë skemës kombëtare të mbështetjes në bujqësi, fermerët mund të përfitojnë deri në 360 mijë lekë mbështetje financiare. Ministrja e Bujqësisë dhe Zhvillimit Rural, Frida Krifca informoi se aplikimet përmes e-Albania janë të hapura prej datës 20 mars deri në 11 prill.
“Masa 2 është për tufën bazë të matrikulluar, për fermat me jo më pak se 100 krerë dele e dhi në vlerë deri në 1200 lekë/krerë, por jo më shumë se 360 mijë lekë për subjekt”, tha Krifca.
Referuar statistikave të Ministrisë së Bujqësisë dhe Zhvillimit Rural, në vitin 2022, u rrit me 20% numri i fermave blegtorale me mbi 200 krerë të imta, krahasuar me vitin 2021. Gjithashtu, gjatë vitit 2022 u rrit me 68% numri i fermave blegtorale të licencuara. Në mbështetje të këtij sektori, është shtuar nga viti në vit dhe fondi nga buxheti i shtetit për subvencionimin e blegtorëve.
