Ministrja e Arsimit, Evis Kushi në këtë ditë feste për të gjithë besimtarët myslimanë ka dhënë një lajm të mirë për pedagogët.
Kushi bën me dije se pas mbledhjes së qeverisë të zhvilluar ditën e djeshme, kanë diskutuar lidhur me pagat e pedagogëve për të cilat vendosën që të rriten që këtë vit dhe jo vitin e ardhshëm ashtu si dhe ishte planfiikuar më herët.
“Pra, që në datën 1 prill 2023, kufiri minimal i pagave të pedagogëve është rritur me 20%, dhe që mbulohet drejtpërdrejt nga buxheti i shtetit, ndërsa kufiri maksimal i pagës është rritur deri në 30%, që do të thotë që përtej rritjes nga buxheti i shtetit me 20%, universitetet në varësi të të ardhurave të tyre mund ta rrisin më tej kufirin maksimal të pagave deri në 30%. Me këtë vendim ne konfirmojmë edhe një herë angazhimin tonë për mbështetjen e vazhdueshme të pedagogëve, mbështetje e cila nisi që vitin e kaluar, me rritjen 15% të pagës në muajin shtator”, shkruan Kushi.
