Kandidati socialist për Bashkinë e Shkodrës në zgjedhjet e 14 majit, Benet Beci thotë se projektet e mira do ta kthejnë Shkodrën Bashkinë e parë në vend për thithjen e donatorëve dhe kthimin e saj në perlën e rajonit.
Beci thotë përmes një video-mesazhi se dëshiron që qyteti i Shkodrës të ketë një Lungomare ashtu sikurse Vlora. Beci shprehet se turizmi në Shkodër ka nevojë për transformim dhe të trajtohet ashtu siç e meriton.
Beci: “Kur mendoj se cili është projekti që përfaqëson më shumë punën time, që ka pas përkushtimin timë më të madh, është projekti i Lungomares së Vlorës. Ky është një nga projektet më të rëndësishme që kam bërë, një nga projektet transformuese të qytetit. Jam krenar për ndryshimin që ka sjellë në jetën e në ekonominë e të gjithë banorëve të zonës dhe aq më tepër për bizneset përreth tij, dyqanet sot, lokalet sot. Do të doja shumë që një projekt të tillë ta bëjmë në Shkodër. Ne mund të transformojmë hyrjen e Shkodrës”.
