Një aksident me makinë në moshën 20-vjeçare e ka lënë të paralizuar Artanin prej më shumë se 20 vitesh. Ai nuk pret mrekulli, por është falenderues për jetën, ndaj shpesh shkon në vende të shenjta siç është edhe Kisha e Shna Ndout në Laç.
“Nuk pres të eci ne kembe, po ndihem mirë kur vij këtu, kam ardhur per qef per lutje”, thotë Artani i cili ndodhet ne karrige me rrota.
Pelegrinazhi i 13 të martave është përmbyllur me mijëra lutje në festën e Shna Ndout. Besimtarët të ardhur nga qytete të ndryshme përmes ndezjes së qirinjve kërkojnë më shumë shëndet dhe ndihmë për familjet e tyre.
“Kam ardhur nga Greqia vetëm për të ndezur qiri për djalin tim, vetëm një djalë kam”, tha nje besimtar tjeter.
I njohur si vendi i mrekullive, besimtarë të religjioneve të ndryshme në emër të sakrificës me lutje dhe falenderime kalojnë nëpër rrugët ku mendohet të ketë shkelur i shenjti Shën Antoni i Padovës. Nga fëmijët e deri tek moshat e treta, të panumërt janë besimtarët që e vizitojnë Kishën në Laç.
