Përplasjet e Ilir Metës kur ishte president me shumicën Socialiste, e detyroi Edi Ramen të artikulonin për herë të parë “disiplinimin” e Metës përmes një ligji organik për institucionin e Presidencës.
Ilir Meta ia la vendin Bajram Begajt, i zgjedhur nga socialistët si “President Normal” dhe për këtë arsye nuk është nevoja për një ligj “disiplinues” por ditet e fundit gjërat kane ndryshuar.
“Ligji për institucionin e Presidentit është një domosdoshmëri. Në shtator duhet t’i rikthehemi”, deklaroi Taulant Balla duke aktivizuar “sirenat e alarmit” brenda Presidencës, në kufijtë e asaj që mund të jetë përplasja e parë mes Bajram Begajt dhe Edi Ramës.
Top Channel ka mësuar se Zv.Kryeministrja Belinda Balluku ka zhvilluar një takim rreth 45 minuta në Presidencë me Bajram Begajn. Burime konfidenciale kanë bërë me dije se janë diskutuar çështje të rëndësishme të lidhura me dy institucionet, por projekt-ligji për institucionin e Presidencës, mendohet të jetë një nga çështjet e nxehta mes palëve.
