Unioni i Transportit Publik ka reaguar në lidhje me ultimatumin e kryebashkikaut Erion Veliaj, se do t’iu hiqej licenca kompanive që do reduktonin numrin e autobusëve gjatë muajit gusht.
“Të gjithë linjat e autobusëve urban në kryeqytet janë në funksion të plotë dhe numri i autobusëve nuk është ulur. Nga verifikimet në terren rezulton se oraret dhe numri i autobusëve që operojnë për shërbimin e transportit në Tiranë ka qenë sikurse ditët e tjera duke mos pasur vonesa për qytetarët“, thuhet në njoftim.
Më herët, Veliaj e cilësoi ultimatumin e Shoqatës së Transportit Publik një pabesi ndaj qytetarëve të Tiranës, sidomos në një periudhë me temperatura mjaft të larta. Ai deklaroi se qëndrimi ndaj cilësdo linjë që do të vendosë të ulë shërbimin do të jetë i ashpër, deri në heqjen e licencës.
