Kryeministri Edi Rama u kërkon qytetarëve të kenë edhe pak durim pasi sezoni turistik, ka rënduar situatën e trafikut në aksin Shkodër-Tiranë.
Teksa iu ka kërkuar ndjesë drejtuesve të automjeteve, për rëndesën e trafikut në segmentin Milot – Kashar, Rama thotë se këtë situatë do ta vuajmë edhe për disa kohë në mungesë të Korridorit Blu.
Sipas Ramës, Korridori Blu do të jetë kolona vertebrore e infrastrukturës turistike të Shqipërisë 2030.
“NDJESË EDHE PAK DURIM JU LUTEM. I ndjekim me vëmendje ankesat e mirëkuptueshme të drejtuesve të automjeteve në aksin Shkodër ? Tiranë këtë verë dhe jemi shumë të vetëdijshëm për faktin që rritja marramendëse e fluksit të vizitorëve në këtë sezon fantastik për industrinë e turizmit, e ka rënduar edhe më shumë se zakonisht situatën e trafikut përgjatë këtij aksi, sidomos në segmentin Milot -Kashar. Shpërblim i madh i përpjekjeve tona këmbëngulëse ky moment shpërthyes për turizmin, por shumë ndjesë për pasojën e këtij zhvillimi të shumëpritur, të cilën do ta vuajmë edhe për disa kohë në mungesë të Korridorit Blu”, shkruan Rama.
