Qeveria Rama ka vendosur ditën e sotme të krijojë një dikaster të ri pranë ministrive shqiptare që ka në fokus inovacionin.
Në mbledhjen e sotme të Këshillit të Ministrave është vendosur krijimi i “nuklave të inovacionit”. Lajmin e ka bërë të ditur zëvendës kryeministrja Belinda Balluku, e cila deklaroi se ishte një kërkesë e kryeministrit Edi Rama.
Balluku shtoi se ky dikaster do jetë brenda çdo ministrie dhe do propozojnë projekte të reja. Po ashtu, këto dikastere do paguhen më shumë se dikasteret e tjerë.
“Krijimi i ‘nuklave të inovacionit’ nëpër ministri, kërkesë e kryeministrit e lindur për shkak të zhvillimeve inovative që ndodhin në Shqipëri. Tashmë Shqipëria operon me teknologji moderne, siç janë satelitët. Duke pasur këto zhvillime teknologjike ne na ka lindur nevoja që brenda ministrive tona të kemi “nukla inovacioni”, do propozojnë projekte të reja. Do na duhet që të dalim në tregun shqiptar për të përthithur sa më shumë njerëz të dhënë ndaj inovacionit. Për të qenë sa më konkurrues, duke ditur pagat për këtë sektor, ne sigurisht kemi vendosur që ta aplikojmë siç kemi bërë me disa kategori të administratës të paguhen me paga më të larta se sa sektorët e tjerë. Në ditët në vijim ne do të kemi mundësi që brenda vjeshtës t’i kemi të disponueshme brenda secilës ministri”, deklaroi Balluku.
