Ajo çfarë pritet të na sjellë nëntoka e Shpiragut, përmes “arit të zi”, ka ngjallur kuriozitet dhe pritshmëri të mëdha publike për ta kthyer këtë pasuri në shërbim të mirëqenies së shqiptarëve.
Profesor i Asociuar, Doktor Stavri Dhima i cili ka punuar për më shumë se 20 vite në Institutin e Kërkimit të Naftës, së fundmi ka zbuluar çfarë përmban nëntoka në Shpirag.
“Në afërsi të Shpiragut në njërën anë ndodhet vendburimi Kuçovës e në anën tjetër në pjesën veriore dhe më tej disa vendburime të vogla si Pekish dhe Murrizi. Në pjesën jug-perëndimore të Shpiragut kemi vendburimin e Patos Mariznës dhe vendburime të tjera. Pra zona e Shpiragut është në mesin e disa vendburimeve që ne i kemi konkrete me burime nafte”, tha profesor Starvi Dhima.
Por cilat janë përmasat e naftës dhe gazit në nëntokën e Shpiragut?
“Ky vendburim është i ngjashëm me atë të Val Dagrit në Itali, ku janë 2 kompani të njohura. Aty prodhohen rreth 85.000 deri 100.000 fuçi naftë në ditë. Ndërkohë ne sot prodhojmë 15.000 fuçi nafte në ditë. Pra është një sasi 5-6 herë më e madhe se ajo që ne prodhojmë nëse do të jemi në këto përmasa. Në metodat gjeo-fizike në pusin e shpuar në pjesën ku ne ndodhemi brenda rezervuarit karbonatik, kemi rezerva nafte dhe gazi, po kemi këtë cilësi nafte që konfirmohen dhe kemi një kat nafte rreth 1.000 metra. Trashësia e atij vendburimi nëse ky volum është i madh në shtrirjen hapësinore po t’i shtojmë edhe dimensionin e thellësisë dhe trashësisë këtu është një burim shumë i madh”, tregon Dhima.
