UEFA ka vendosur t’i besojë Shqipërisë organizimin e finaleve të Kampionatit Europian 2025 për grupmoshën 17-vjeçare.
Komiteti Ekzekutiv i UEFA-s në mbledhjen e zhvillua në Qipro ka votuar “PRO” kandidaturës së Shqipërisë e cila në vitin 2025 do të organizojë finalet e turneut kontinental. Gjithashtu për zhvillimin e një kompeticioni të tillë kërkohen 8 qendra stërvitore me fusha me bar natyral, të cilat do të jenë në aksin Tiranë-Durrës.
Lajmi fantastik është konfirmuar edhe nga kryeministri Edi Rama i cili thekson se kjo arritje tregon progresin e Shqipërisë ku disa vite më parë ishin gjëra të paimagjinueshme për t’u menduar.
“Pas finales së UEFA Conference League të vitit të kaluar, UEFA ka vendosur sot që Kampionati Europian për moshat U17, i vitit 2025 do të mbahet në Shqipëri në 4 stadiume: “Air Albania”; “Loro Boriçi”; “Elbasan Arena” dhe “Egnatia Arena”. Gjëra të paimagjinueshme deri disa vjet më parë”, shkruan Rama.
