Partia Socialiste ka kërkuar masa disiplinore ndaj 20 deputetëve të Partisë Demokratike, pas tensioneve dhe përplasjeve të regjistruara këtë të enjte në Kuvend.
Përmes një kërkese drejtuar kryetarit të Kuvendit, Niko Peleshi, dhe Sekretariatit për Procedurat, Votimet dhe Etikën, grupi parlamentar i PS-së kërkon përjashtimin e deputetëve nga pjesëmarrja në seancat plenare dhe komisionet parlamentare, me afate që variojnë nga 10 deri në 60 ditë.
Sipas kërkesës së socialistëve, masa më e rëndë ësh ajo e përjashtimit për 60 ditë, propozohet për gjashtë deputetë të PD-së, Flamur Noka, Belind Këlliçi, Fidel Kreka, Edi Paloka, Besart Xhaferri dhe Luçiano Boçi. Për 14 deputetët e tjerë demokratë, PS kërkon përjashtimin për 10 ditë. Bëhet fjalë për Gjin Gjonin, Bardh Spahinë, Albana Vokshin, Elda Hotin, Xhelal Mziun, Gent Strazimirin, Enno Bozdon, Kastriot Pirolin, Kliti Hotin, Flamur Hoxhën, Arjan Ndojën, Ivi Kason, Zija Ismailin dhe Blendi Himçin.
Gjithashtu në kërkesën e tyre, socialistët pretendojnë se deputetët e opozitës penguan zhvillimin normal të seancës plenare, bllokuan foltoren dhe u përfshinë në veprime që cenuan rendin parlamentar dhe procesin e votimit. Ata e përshkruajnë se incidentet nisën që në fillim të seancës, kur deputeti Flamur Noka iu drejtua foltores, e goditi atë dhe më pas përdori fjalë fyese ndaj kryetarit të Kuvendit. Sipas tyre, më pas Belind Këlliçi dëmtoi pajisjet e foltores, ndërsa Flamur Noka sulmoi fizikisht deputetë të mazhorancës dhe dëmtoi pajisjet elektronike të votimit.
Në kërkesë përmenden gjithashtu Belind Këlliçi, Besart Xhaferri, Edi Paloka, Fidel Kreka dhe Luçiano Boçi, kanë fyer dhe goditur me shishe uji deputetë të mazhorancës. Socialistët argumenton se veprimet e pretenduara përbëjnë shkelje të normave të etikës dhe disiplinës parlamentare, ndaj kërkon marrjen e masave disiplinore ndaj deputetëve të opozitës.
