Ministrja e Shtetit për Marrëdhëniet me Parlamentin, Elisa Spiropali foli për veton greke për çështjen “Beleri”.
Ajo theksoi se shpreson që Greqia nuk do ta përdorë një çështje bilaterale mes dy vendeve për të bllokuar proceset integruese nga Athina zyrtare.
“Nuk mund të komentoj as vendimet e prokurorive, as të gjykatave dhe as nuk jam drejtor burgu. Gjithmonë me Greqinë ne kemi patur marrëdhënien strategjike që kemi pasur dhe synojmë që edhe me Greqinë t’i thellojmë marrëdhëniet e bashkëpunimit. Shpresojmë që grindjet ballkanike nuk do ndërhyjnë në çështjet e integrimit europian. Shqipëria është sjellë në mes të Ballkanit si një vend europian. Ne shpresojmë që Greqia të mos kthehet në një pengesë të padrejtë për çështjet europiane të Shqipërisë. Jemi besimplotë që marrëdhëniet bilaterale mes dy vendeve nuk do hyjnë në procesin integrues”, tha Spiropali.
