Ministri i Brendshëm, Taulant Balla garantoi se vitin tjetër do të zgjerohet fasha për familjet e reja të punonjesve te policise të cilet do të aplikojnë kredi të lehtësuar për të blerë shtëpi.
Balla tha se rreth 900 punonjës të policisë së shtetit nuk e kanë një banesë, teksa garantoi se në vitin 2024 dhe 2025 do të hapen më shumë kuota për aplikim.
“Kur mora detyrën një nga angazhimet e mia ishte dhe kredia. Meraku i kryeministrit ishte nëse do arrinim që brenda festave të 2023, të kemi disa prej përfituesve. Në këtë raund të parë janë 92 të përzgjedhur si përfitues të këtij programi. Më frymëzon fakti që numri i punonjësve të policisë që aplikuan ishte i madh, dhe vitin e ardhshëm do të hapim një fashë më të madhe për të përfituar shtëpi me kredi të lehtësuar apo falas. Kemi diku te 900 punonjës policie pa një shtëpi. Imagjinoni çfarë sakrifice të punosh orar pa orar dhe mos kesh një shtëpi tënden. Në 2025 duam të kemi rreth 500 familje që të mund të përfitojnë”, tha Balla.
