Rastet me grip dhe infeksione të tjera respiratore vijojnë të njohin rritje alarmante në gjithë vendin. Sipas ISHP-së, në javë regjistrohen rreth 14 mijë raste.
“Kemi një rritje të lehtë të infeksioneve të gripit dhe Covidit. Pozitiviteti i rasteve me grip ka arritur diku te 10-12%. Gripi prek të gjitha grupmoshat pa përjashtim, situata mund të bëhet dramatike, sepse gripin ne e konsiderojmë një sëmundje serioze”, thotë nëndrejtori i ISHP, Dritan Ulqinaku për mikrofonin e TV Klan.
Mes Covidit dhe gripit, ky i fundit po dominon. Piku i virozave të stinës pritet të arrihet në datat e para të muajit Shkurt.
Megjithatë duhet treguar kujdes, pasi virusi i gripit transmetohet lehtësisht. Ekspertët këshillojnë qytetarët që nëse temperatura e trupit nuk u ulet për tre ditë të drejtohen menjëherë tek mjeku.
