Veç humbjes, përballja me Italinë ka sjellë edhe pasoja të tjera për kombëtaren shqiptare. I dëmtuar në atë ndeshje ka mbetur sulmuesi i krahut të djathtë Jasir Asani, i cili ndjen dhimbje në këmbën e majtë.
Anësori kuqezi ka mbetur i dëmtuar në momentin kur është goditur nga Dimarco, tek goli i dytë i Italisë, i shënuar nga Barrela, i cili u pa edhe nga sistemi VAR, por që u vendos të mos konsiderohej si faull.
Kuqezinjtë janë kthyer gjatë ditës së diel në fushën stërvitore, por Jasir Asani nuk ka qenë i pranishëm. Për të mos rrezikuar, stafi i përfaqësueses e ka lënë pushim sulmuesin anësor në stërvitjen e djeshme.
Jasir Asani është një nga lojtarët e paprekshëm në formacionin e Silvinho, kjo edhe për shkak se alternativat në krahun e djathtë mungojnë.
Gjendja e futbollistit do të vlerësohet në ditët në vijim, për të parë nëse a do të jetë i gatshëm për ndeshjen kundër Kroacisë, e cila do të luhet të mërkurën.
