Në një kohë kur të gjithë ankohen për çmimet e larta nëpër plazhet e jug, e kundërta ndodh me Shëngjinin. Ky sezon veror është i mbarë për operatorët turistikë ku pothuajse të gjitha hotelet janë tejmbushur me pushues duke e kthyer në plazhin e Shëngjinit në më të preferuar në vend.
Prenotimet janë të shumta për muajin korrik dhe gusht ku pothuajse çdo hotel nuk ka vende të lira dhe operon me kapacitet të plotë.
Melisa Shima, operatore turistike: “Rezervimet janë të shumta si për Korrikun dhe për Gushtin. Mendoj që sezoni do të zgjasë dhe Shtatori gjithashtu do të jetë shumë i frytshëm. Më besnikët e këtij plazhi janë pushuesit nga Kosova. Por shumë rezervime ka edhe nga turistë të huaj kryesisht të ardhur nga Europa, siç janë: Gjermania, Italia, Suedia, Franca”.
Shëngjini është një nga zonat më të frekuentuara në vend që zgjidhet nga vizitorë të shumtë për kushtet, natyrën, qetësinë dhe çmimet e lira dhe shumë të leverdisshme.
