Vangjel Tavo fitoi bindshëm garën në Bashkinë e Himarës duke marrë mbi 1400 më shumë vota se kandidati i opozitës Petro Gjikuria. Por detaji që ra në sy ishte rezultati i disa kutive në fshatrat e zonës së Vlorës, që janë nën administrim nga Bashkia Himarë dhe që i kanë dhënë avantazh të ndjeshëm socialistit Tavo.
Sipas shifrave zyrtare të KQZ, bie në sy se socialisti ka marrë bindshëm vota në Lumin e Vlorës, pikërisht në fshatrat Tërbaç, Vranisht, Bolenë e Kuç.
Më e veçanta ka qenë ajo e kutisë 4589, në fshatin Tërbaç, ku pas numërimit rezultoi se Tavo mori 330 vota, kurse rivali i tij Gjikuria vetëm 7 vota, teksa 3 prej tyre supozohet se ishin votat e komisionerëve të opozitës. E përkthyer në shifra elektorale, në këtë qendër Tavo ka fituar me 98,3% e votave, rast gati i paprecedentë në zgjedhje.
Në total sipas KQZ, Tavo ka marrë 5.022 vota përballë rivalit të tij, Petro Gjikuria, i cili ka marrë 3.545 vota.
