Çmimet në pjesën më të madhe të bregdetit shqiptar këtë sezon veror kanë qenë ndër temat më të diskutuara për shtrenjtësinë e tyre.
Por në Seman, banorët e zonës dhe të tjerë që vijnë nga më larg kanë gjetur një mënyrë për të bërë pushime pashpenzuar fare as për shezllongë dhe as për të fjetur.
Ndërsa rërën dhe detin e kanë me shumicë dhe të pastër, pushuesit kanë ngritur dhe disa kasolle me ç’të mundin në plazhin e Semanit dhe që i përdorin për të pushuar gjatë ditës dhe disa edhe për të fjetur gjatë natës.
Edhe pse pamja që ofrohet nuk është ajo e duhura, banorët shprehen të kënaqur me këtë mënyrë të të bërit pushim. Plazhi i Semanit ndodhet 18 kilometra larg qytetit të Fierit dhe ka një vijë bregdetare prej afro 7 kilometra. Pjesa më e madhe e këtij bregdeti është thuajse tërësisht natyror dhe njihet për rërën kurative dhe ujin e pastër.
