Teksa parkimi i automjeteve në kryeqytet është një nga problemet më të shpeshta të shoferëve, Bashkia e Tiranës ka vendosur të aplikojë parkimin smart, që mundëson parkimin e 2 makinave në një vend të vetëm.
Ky dikaster ka hapur tenderin, me fond limit prej rreth 253 mijë euro për 40 vendparkimet e para, duke specifikuar se përmes postit smart rritet hapësira e parkimeve si dhe lehtësohet qarkullimi i mjeteve, pasi shmangen parkimet dyshe.
Në dokumentet që shoqërojnë procedurën tenderuese, përcaktohet se posti smart i parkimit duhet të jetë i ndërtuar nga një platforme e galvanizuar çeliku dhe të ketë 2 poste parkimi të pavaruara.
Postet duhet të jenë të vendosura paralel vertikalisht sipër njeri-tjetrit dhe duhet të funksionojnë nëpërmjet një platforme në formë ashensori, që ngre makinën e parë që parkohet, në mënyrë që të lejojë parkimin e makinës tjetër poshtë saj. Gjithashtu, specifikohet se platforma duhet të ketë peshëmbajtje maksimale deri në 2000 kg, ndërsa lartësia e ngritjes së duhet të jetë jo më pak se 1750 mm.
Gjithashtu, kërkohet që platforma të ketë bllokues elektrik sigurie që te garantoje sigurinë e makinës që do të parkohet poshtë saj. Afati i dorëzimit të ofertave nga subjektet e interesuar është data 18 shtator 2024, ndërkohë që postet duhet të jenë gati 3 muaj nga nënshkrimi i kontratës.
