Zbardhen detaje të reja nga takimi i Drejtorit të Policisë së Shtetit Ilir Proda me drejtuesit e komisariateve dhe Policisë së Tiranës ku në fokus ishte protesta e opozitës, e cila mbahet sot në orën 18:00.
Proda iu ka kërkuar vartësve të japin porosi të qarta për efektivët në terren që të mos provokohen nga protestuesit dhe ndërhyrjet të jenë sa më të pakta. Një porosi e veçantë ka qenë për personat me precedentë të mëparshëm kriminalë.
“Kujdes mos u provokoni nga protestuesit. Ndërhyrjet të jenë të minimizuara, vetëm në raste nevoje. Mos të krijohen përplasje të provokuara. Ruani qetësinë dhe godinat e institucioneve. Kujdes listat me emrat e personave që kanë precedentë, të mbahen nën vëzhgim. Të filmohen dhe dokumentohen të gjitha veprimet e dhunshme dhe të jashtëligjshme”, mësohet se ka qenë këshilla e kryepolicit Proda.
