Gjithçka është e hapur në “Grupin B1” të Ligës së Kombeve. Çekët numërojnë 8 pikë, ndjekur nga Gjeorgjia e Shqipëria me 7 dhe Ukraina 5, diferenca në këtë grup pritet të ndodhë gjatë ndeshjeve të fundit.
Kombëtarja kuqezi të martën është e detyruar për të fituar për të shpresuar rrëmbimin e vendit të parë. Me një triumf të mundshëm do ngjiteshin në kuotën e 10 pikëve. Në favor për të realizuar një gjë të tillë do të ishte një barazim mes Çekisë dhe Gjeorgjisë, pasi në rast se ndodh diçka e tillë dy kombëtaret do numëronin respektivisht 9 dhe 8 pikë.
Ndërkaq, një barazim i yni do na ngjiste në kuotën e 8 pikëve dhe do përkthehej në Play-Off për të qëndruar në Divizionin B, gjithmonë nëse Gjeorgjia nuk mposhtet në Pragë. Humbja ndaj Ukrainës do të ishte e rëndë për Shqipërinë, pasi do na zbriste një divizion më poshtë për të vulosur një “zhgënjim” në Ligën e Kombeve.
