Deputeti i PS-së, Petro Koçi u shpreh se partia ku ai bën pjesë dhe që po qeveris vendin që prej vitit 2013 duhet të reflektojë dhe të perfeksionojë sistemin e përzgjedhjes.
Deputeti socialist nuk hezitojë të përmendë edhe institucionin që ka nevojë të shkundet dhe sipas tij, ai është Kadastra, ndërsa shtoi se duhen edhe ndryshime në buxhet.
“Pjesa që ne mund t’i bëjmë vërejtje vetes është kjo që kur bie standardi, çfarë ndodh pastaj, edhe ata njerëz që nuk e kanë standardin normal, mendojnë se edhe ata mund të bëhen deputetë dhe vrapojnë për të kandiduar për kandidatë. Kjo ngjan si këto talent show ku shpesh vijnë edhe njerëz që janë qesharakë. Një nga mësimet që ne duhet të nxjerrim nga disa ngjarje që lidhen me veprimin e drejtësisë është që sistemi ynë përzgjedhës duhet të perfeksionohet. Kjo jo duke e kthyer partinë në një prokurori sepse kjo është e pamundur, por mendoj se duhet të gjendet një mënyrë që të vilet opinioni publik më mirë sesa sot. Opinioni publik nuk është i pagabueshëm, por është këshilltari më i mirë. Duhet të vilet edhe opinioni publik për individët. Në dallim nga PD ne distancohemi nga këta individë, gjithsesi ne duhet ta perfeksionojmë sistemin përzgjedhës që të mos ketë më raste të tilla”, u shpreh Koçi në A2 CNN.
