Deputeti i Partisë Socialiste, Etjen Xhafaj është shprehur se PD po përgatit skenarin që të akuzojë qeverinë për vjedhje votash, pas humbjes së zgjedhjeve të 11 majit.
Xhafaj tha se kur ka qeverisur PD vendin, e ka lënë me borxhe dhe firmat piramidale. Ai shtoi gjithashtu se vota e diasporës nuk mund të blihet dhe akuzat e opozitës janë baltosje.
“E kemi parë se çfarë kanë bërë 2 herë që kanë qenë në qeverisje. Herën e parë e lanë me piramidat dhe gropat e tyre, herën e dytë e lanë me detyrimet e pashlyera dhe gropat e tyre. Që nga viti 2013 që ne qeverisim Shqipërinë, përgjegjësia është akoma më e madhe, që të komunikojmë me banorët, me votuesit tanë, edhe me ata që nuk na votojnë ne dhe që nuk votojnë fare. Mobilizimi në Tiranë vjen si pasojë e impaktit që Tirana ka në hartën elektorale të vendit. Po ashtu është edhe motori ekonomik i vendit. Po ashtu është edhe qarku që ka numrin më të madh të votave për PS. Regjistrimi është një pjesë e domosdoshme e procesit të votës së diasporës. Opozita e dinte këtë që nga fillimi. Vullneti nga ana e PS ka qenë që nga viti 2009 dhe këtej për votën e diasporës. Ka një fokus të madh që të angazhojmë dhe mobilizojmë të afërmit tanë në diasporë për të votuar. Opozita po parapërgatit një skenar që ne e kemi stërparë në të gjitha zgjedhjet e fundit”, tha Xhafaj.
