Gazetarja Klodiana Lala ka treguar momentet e para se si e mori vesh lajmin e arrestimit të kryebashkiakut të Tiranës Erion Veliaj.
Fillimisht ka qenë një burim ai i cili i ka komunikuar prezencën e oficerëve të BKH dhe efektivëve të policisë në zyrën e Veliajt, por në çastet e para ka qenë e paqartë nëse bëhej fjalë për arrestimin e kryebashkiakut apo një kontroll rutinë.
“Kemi qenë thuajse pjesa më e madhe e gazetarëve të kronikës në ambientet e jashtme të SPAK sepse prisnim të mbaronte një seancë për një kryebashkiak tjetër. Kam marrë nga një telefonatë nga një burim i besuar që më tha e agjentët e BKH dhe policia kishin zbarkuar në zyrën e kryetarit të Bashkisë Tiranë por nuk më konfirmoi për arrestim apo kontroll rutinë. Fakti që hetimet ishin intensifikuar dhe kishte veprime ditë pas dite, ne gazetarët ndjekim hap pas hapi ngjarjet dhe patjetër që pyesim burimet, komunikojmë dhe kuptojmë dinamikën si zhvillohen gjërat. Atë ditë më bëri përshtypje që një nga dy prokurorët e çështje, zoti Dado nuk kishte zbritur në gjykatë për asnjë nga çështje e tij, ishte vetëm për një çështje që u shty”, u shpreh ajo.
