Partia e Lirisë dita ditës po zhytet në një krizë të thellë ku sipas të gjitha sondazheve po e pret një humbje katastrofë në zgjedhjet e “11 majit”.
Denis Hidri, një prej zyrtarëve të kësaj partie, disa herë kandidat, ka dhënë dorëheqjen dhe është tërhequr nga kjo forcë politike duke akuzuar drejtuesit e saj për katapultim të njerëzve pa kontribute në krye të partisë, pa i lënë hapësirë garës brenda strukturave.
Denis Hidri akuzon sekretarin e Përgjithshëm Tedi Blushi se është katapultuar nga rruga pa qenë i votuar asnjëherë në struktura.
“Partia e Lirisë u mbush me njerëz anonimë, pa asnjë lloj kontributi, ndërkohë që militantë të kësaj force politike, të cilët kanë dhënë shpirtin, emrin, djersën, nuk u vlerësuan, po u lanë në hije, në harresë të plotë dhe përsëri nuk u vlerësuan, për të qenë pjesë e strukturave të larta drejtuese. Njerëz që vijnë nga rruga për t’u bërë Sekretar të Përgjithshëm… Raste të përsëritura kur llojlloj njeriu, futet në sekretariate, përsëri pa asnjë lloj kontributi. “Meritokracia” si standard dhe kriter, fton për protagonizëm dhe sukses, profesionistët e lëpirjes dhe të avancimit në gjunj. Sport i vjetër, të cilin për fat nuk e njoh dhe nuk e ndaj”, shkruan Hidri në tekstin e largimit të tij nga Partia e Lirisë.
Miranda Rira, anëtare e kryesisë së PL ia mbështet mendimin.
“Shumë gjëra që ti thua qëndrojnë nuk janë arsye për të marrë një vendim te tillë, sepse ne kontratën nuk e kemi me njerezit që hyjne në parti nga oxhaku dhe dalin nga dritarja, por e kemi me Ilir Metën. Po, është e vërtetë që njerez pa asnjë kontribut, pa kaluar asnjë fushatë, asnjë rezultat, asnjë votim janë emëruar e katapultuar nderkohe që njerëz të tjerë që kanë dhënë shpirtin dhe gjithçka jo vetem që janë lënë në hije, por edhe janë përzënë me turli farë brrylash e thashethemesh. Sepse ai/ajo që është i/e paaftë, servil/e derdimen/e, pa karakter, rrëmbythje, përzë dhe lufton të aftin, nuk lufton të paaftin.E kundërta është e vërtetë, ata që janë te pregatitur, profesionistë, open minded vetëm afrojnë njerëzit, përqafojnë vlerat dhe parimet. Gjithsesi, unë mendoj se koha është treguesi më i mirë, lumi do te rrjedhe në shtratin e vet, dhe pemën pa kokrra e pa rrënjë shume shpejt e fshin era, por qëndrestarët mbeten, në kohë të mirë e në kohë të keqe”, shkruan Rira.
Duket se punët te Partia e Lirisë janë shumë më keq dy muaj para zgjedhjeve të përgjithshme parlamentare. Me presidentin e Partisë në burg, dhe me debatet që nuk mbyllen brenda eksponentëve të mbetur në këtë parti, organizimi është një “mision i pamundur.
