Kina ka reaguar ashpër ndaj premtimit të Presidentit Donald Trump për të vendosur tarifa të tjera, duke paralajmëruar se Pekini është i gatshëm për një luftë tarifore ose “çdo lloj lufte tjetër”.
Ky reagim erdhi pas vendosjes së taksave të reja prej 25% për importet nga Meksika dhe Kanadaja, si dhe për mallrat kineze.
Trump, në fjalimin e tij tha se do të vendosë tarifa të tjera më 2 prill, përfshirë tarifa reciproke dhe masa të tjera që synojnë balancimin e pasqyrës tregtare që ka zgjatur për shumë vite.
Ministria e Punëve të Jashtme të Kinës e kundërshtoi ashpër këtë vendim duke thënë: “Nëse SHBA kërkon luftë, qoftë luftë tarifore, luftë tregtare ose çdo lloj lufte tjetër, ne jemi të gatshëm të luftojmë deri në fund”.
Kina e ka cilësuar krizën e fentanilit një “justifikim të dobët” për rritjen e tarifave dhe e ka akuzuar administratën Trump për “shantazh” dhe përpjekje për të përdorur kërcënime dhe presion ndaj Kinës.
