Mbi 200 profesionistë të zbatimit të ligjit i janë nënshtruar trajnimeve të organizuara në kuadër të bashkëpunimit me Ambasadën e Shteteve të Bashkuara në Tiranë, me fokus forcimin e aftësive hetimore dhe rritjen e llogaridhënies në punën e Policisë së Shtetit.
Përmes një postimi në kanalin zyrtar, Ambasada e SHBA-së ka bërë me dije se specialistë të krimit nga Policia e Shtetit kanë përfunduar Kursin për Hetimin e Krimeve, Niveli 1, në Akademinë e Sigurisë.
“Çdo hetim i mirëfilltë nis nga bazat: të bësh pyetjet e duhura, të shqyrtosh provat dhe të ndjekësh faktet.
Urime specialistëve të krimit nga Policia e Shtetit që përfunduan Kursin për Hetimin e Krimeve (Niveli 1) në Akademinë e Sigurisë. I hartuar nga Programi Ndërkombëtar i Ndihmës për Trajnimin për Hetimet Penale (ICITAP) i Departamentit të Drejtësisë të SHBA, ky kurs forcon aftësitë hetimore dhe ndihmon në zbatimin e standardeve të njëjta dhe në rritjen e llogaridhënies në punën e policisë.
Gjatë vitit 2026 janë certifikuar më shumë se 200 profesionistë të zbatimit të ligjit. Puna e tyre forcon luftën tonë të përbashkët kundër krimit transnacional dhe korrupsionit dhe ndihmon në mbrojtjen e komuniteteve në Shqipëri dhe në Shtetet e Bashkuara”, shkruhej në postimin e faqes së Ambasadës së Amerikës në Tiranë.
Kujtojmë që hetuesit e Byrosë Kombëtare të Hetimit janë produkt i një trajnimi më shumë se 6 mujor nga ekspertë amerikanë që vijnë posaçërisht nga FBI për të përgatitur të rinjtë që zgjedhin të bëhen pjesë e këtij institucioni.
