Deklarata e kryeministrit Edi Rama për një kryeministre grua në vitin 2030, duke parashikuar fitoren e një mandati të pestë qeverisës për PS-në, edhe pse është ende në garë për një mandat të katër, ka ngjallur jo pak habi dhe debate.
Për ish-ministren e Drejtësisë, Etilda Gjonajn nuk bëhet fjalë për një sensacion politik, pasi sipas saj, Rama i ka besuar gjithmonë grave.
“Besoj se vetë Edi Rama i ka besuar fortë grave, duke e parë këtë në numrin e mistrave gra në kabinetin qeveritar. E marr në konsideratë këtë, por edhe në detyra të tjera që ai i ka besuar grave dhe do të thotë që beson te puna. Përkushtimi dhe integriteti i grave. E kemi treguar me punë, duke mos qenë aty thjeshtë numra, por secila nga ne duke drejtuar edhe në kabinetin qeveritar profile të vështira”, tha Gjonaj.
