Kreu i KQZ, Ilirjan Celibashi deklaroi se synimi i institucionit që ai drejton është shpallja sa më e shpejtë e rezultatit të zgjedhjeve të 11 majit, idealisht para pasdites së ditës së martë, ashtu siç ndodhi në proceset e mëparshme.
Celibashi tha se KQZ është përgatitur për të përmbyllur vlerësimin e votave brenda vendit brenda afatit ligjor.
“Do të ishte shumë mirë nëse rezultatin do ta shpallim më shpejt se zgjedhjet e kaluara, më shpejt se pasditja e së martës” u shpreh Celibashi duke shtuar se procesi i votave nga jashtë vendit mund të ndikojë në kohën finale të publikimit të rezultatit përfundimtar.
Celibashi paralajmëroi gjithashtu se ndonëse mund të krijohet një ide e qartë mbi rezultatin që në mëngjesin pas ditës së votimit, ky trend nuk duhet konsideruar i pandryshueshëm.
