Pas humbjes katastrofë ne zgjedhje, Eurodeputeti grek Fredi Beleri është shprehur se edhe sikur “Shën Kozmai” të ishte përballë, sërish nuk do të arrinte dot ta mundte Edi Ramën.
“Ne si minoritarë dhe ortodoksë kemi Shën Kozmanë, tek i cili besojmë shumë. Ne themi se edhe Shën Kozmai të ishte përballë regjimit të zotit Rama do humbiste. Organet e PD duhet të bëjnë diçka për të marrë fund kjo tirani, pse jo dhe dorëheqje. Zoti Berisha është njeriu më me përvojë në politikën shqiptare dhe jam i bindur që do bëjë atë që duhet”, tha Beleri.
Sa i përket protestës së të premtes, Fredi Beleri u shpreh se ajo nuk ka asnjë vlerë. Ai shtoi se opozita nuk duhet të presë nga LaCivita, nga ndonjë gjerman apo grek, që t’i zgjidhë hallet.
“Për mua nuk ka asnjë vlerë asnjë tubim dhe demonstratë një javë pas zgjedhjeve, edhe pse zgjedhjet janë vjedhur. Duhet të bindim qytetarët se nuk duhet të presim nga La Civita, nga ndonjë gjerman apo grek të zgjidhë hallet tona. Çdo shtet ka interesat e veta në Shqipëri. Për mua opozitarët nuk kanë justifikim”, tha nder te tjera Beleri.
