Pasi u mor i pandehur, kreu i Partisë së Lirisë Ilir Meta flet për akuzat e SPAK dhe lobimin e LSI në SHBA.
Madje Ilir Meta fton moderatoren Grida Duma që ajo së bashku me analistët e emisionit “Top Story” të shkojnë dhe ta intervistojnë ish-presidentin në ambientet e burgut 313.
“Gjykimi po afron dhe dielli nuk mbulohet me shoshë. Nuk kemi të bëjmë me një “Meta-Gate”, por me një “SPAK-Gate” që po vjen drejt nesh. E dashur Grida, Ju ndoqa dje me vëmendje, pasi Avokati im i ri , Z. Kujtim Cakrani, më tha se ishte i ftuar nga ju. Kur pashë panelin m’u kujtua vlerësimi i OSBE-ODIHR, se 87% e mediave dhe audiencës dominohet nga Qeveria.
Kjo pasi pashë një njeri të vetëm (Avokat Cakrani), i cili natyrisht ka për detyrë të më mbrojë mua tashmë ligjërisht, përballë tre analistëve të ftuar, të cilët thanë apo interpretuan gjëra që as vetë prokurorët e SPAK-ut nuk do t’i kishin thënë vetë. Sa shumë gënjeshtra dëgjon njeriu në një debat aq të shkurtër! E dashur Grida meqënëse unë nuk vij dot në studio, të lutem kërko një leje te Drejtoria e Përgjithshme e Burgjeve që me të gjithë analistët që kishe ftuar dje të bëjmë një panel këtu (te salla e ping-pongut) për t’iu përgjigjur të gjitha pyetjeve të tyre të djeshme dhe të tjera. Do kalojmë bukur, të siguroj!”, shkruan ndër të tjera Ilir Meta.
