Afati po mbaron për Sali Berishën. Doktori po i reziston nenit Basha, por koha nuk është në favor të tij. Një pikë tjetër brenda nenit, vetëm dy reshta sipër, i kujton doktorit se mandat i tij është 4-vjeçar dhe duhet të përfundojë më 22 maj të vitit 2026.
Edhe 10 muaj kanë mbetur nga ajo datë, dhe Berisha duhet të rihyjë në zgjedhje për kryetar, por brenda të njëjtit nen i del dhe “BASHA” që nuk e lejon më të kandidojë pasi ka humbur zgjedhjet.
“Kryetari i Partisë zgjidhet me votim të fshehtë të të gjithë anëtarëve të PDSH, sipas parimit “Një anëtar, Një votë”. Modalitetet e procesit përcaktohen nga Rregullorja e Brendshme e PDSH. Mandati i kryetarit është katër vjet”, thuhet në pikën e gjashtë.
“Në rast se pas shpalljes së rezultatit të zgjedhjeve të përgjithshme për Kuvendin, Partia nuk rezulton forcë fituese qeverisëse, mandati përfundon menjëherë dhe automatikisht për shkak të Statutit. Në këtë rast, kryetarit që i përfundon mandati, nuk i lejohet kandidimi në zgjedhjet pasardhëse për kryetar partie”, thuhet në pikën tetë.
Doktori e ka provuar me kohë se nuk respekton statutin me të cilin premtoi rithemelimin, por tani është në kurthin qe ngriti vetë. Nëse nuk pranon nenin Basha, do të duhet as të mos bëjë zgjedhje? A mos janë kështu zgjedhjet farsë edhe brenda PD?
Pas primareve dhe karriges së tij, Berisha po mban nën frikën e mosrespektimit të statutit, edhe gjithë kupolën e PD, të vjetër e të rinj.
