Ish-ministri Ilir Beqaj, i cili ndodhet në qeli, ka zgjedhur t’i Kuvendit të Shqipërisë, përmes një letre të hapur, ku ngre një sërë pyetjesh lidhur me funksionimin e institucioneve të pavarura të drejtësisë dhe raportimet e tyre vjetore para deputetëve.
Mungesa e llogaridhënies dhe e interesit real të Kuvendit për të ushtruar kontrollin që i takon mbi funksionimin e sistemit të drejtësisë është një ndër kritikat e Beqajt të cilën ka vendosur që t’ia shprehë publikisht deputetëve.
Sipas Beqajt, raportimet vjetore të institucioneve si KLGJ, KLP, ILD apo Prokuroria e Posaçme janë kthyer në rituale boshe, ku drejtuesit shmangin përgjigjet dhe deputetët heshtin në emër të “pavarësisë”.
“Kur kam qenë vetë në atë sallë, nuk i kam kushtuar ndonjë interes të veçantë këtyre raportimeve. Më shumë më kanë tërhequr ato të ERRE, AKEP, ERRU, Bankës së Shqipërisë apo Autoritetit të Mbikëqyrjes Financiare. Por sot, me distancë dhe përvojë konkrete me sistemin e drejtësisë, më është bërë e qartë se Kuvendi i Shqipërisë ka dështuar për dy vite rresht me raportimet e institucioneve të pavarura si KLGJ, KLP, ILD, etj. Drejtuesit e këtyre institucioneve iu shmangën përgjigjeve për pyetjet konkrete, sepse janë të pavarur. Dhe, në një farë mënyre, kanë të drejtë. Aq më tepër kur vetë ata që u kanë dhënë me votë pavarësinë, nuk mund të jenë ata që ua cenojnë. Ka edhe deputetë që fshihen pas të njëjtit justifikim: “janë institucione të pavarura, nuk duhen ngacmuar.”, shkruan Beqaj.
